Mashujaa wa Simba hii leo ni washambuliaji Hamisi Kiiza Diego aliyefunga kwa mkwaju wa penati dakika ya 52 nae Dany Lyanga akisukumizia kambani bao la pili dakika ya 60.
Matokeo hayo yanaendelea kupalilia kibarua cha kocha msaidizi wa wekundu hao Jackson Mayanja ambaye anaiongoza Simba kwenye ushindi unaowapelekea kujisogeza kileleni mwa ligi hiyo ambapo kwa sasa wanafikisha pointi 33.
katika mechi nyingine huko Mkwakwani mjini Tanga Azam FC wakarejea kileleni mwa ligi hiyo kwa kufikisha pointi 39 baada ya kuitandika Mgambo JKT kwa bao 2-1 shukrani kwa beki wao Shomari Kapombe aliyefunga mabao yote mawili..
kunako uwanja wa Kambarage mjini Shinyanga Stand United chama la wana ikawazamisha wana kishamapanda wa Toto Africans kwa kuwatandika bao 2-1, jijini Mbeya Tanzania Prisons ikaizaba Coastal Union bao 2-1 shukrani kwa nyota wake Jeremiah Juma na Mohamed Mkopi .
Kunako uwanja wa Nangwanda Sijaona mjini Mtwara wagonga nyundo wa jiji la Mbeya klabu ya Mbeya City wakakutana na kipigo cha aina yake wakivurumishwa na wenyeji wao Ndanda FC mabao 4-1 huku Atupele Green na Omary mponda wakifunga mabao mawili kila mmoja.
Hapo kesho katika uwanja wa Taifa jijini Dar es salaam Yanga watakuwa wakioneshana kazi na wanalizombe klabu ya Majimaji kutoka mkoani Ruvuma, Mwadui wataialika Kagera Sugar mjini Shinyanga nayo Africans Sport watakabiliana na Mtibwa Sugar.
