Jumapili , 2nd Aug , 2020
Na Elbogast Myaluko 

Klabu ya soka ya Simba imekamilisha msimu kwa kutwaa kombe la tatu baada ya leo Agosti 2, 2020 kushinda ubingwa wa Kombe la Shirikisho nchini kwa kuifunga Namungo FC magoli 2-1 kwenye mchezo wa fainali uliopigwa kwenye uwanja wa Nelson Mandela Sumbawanga.

Submitted by Elbogast on Jumapili , 2nd Aug , 2020

Wachezaji wa Simba wakishangilia ubingwa wao

Katika mchezo huo wa fainali Magoli ya Simba yamefungwa na Luis Miquissone dakika ya 27, John Bocco dakika ya 39 huku lile la Namungo FC likifungwa na Edward Charles Manyama dakika ya 56.

Luis Miquissone ameibuka mchezaji bora wa mchezo wa fainali na kukabidhiwa tuzo yake.

Clatous Chama yeye ameibuka kuwa mchezaji bora wa mashindano hayo msimu wa 2019/20.

Kwa ujumla msimu huu Simba walianza na Kombe la Ngao ya Jamii kwa kuwafunga Azam FC kisha wakatwaa ubingwa wa Ligi Kuu soka Tanzania bara na sasa wamemaliza kwa Kombe la Shirikisho.

Kwa ubingwa huyo klabu ya Simba imekabidhiwa kombe  na fedha Tsh Milioni 50 pamoja na medali.

Simba sasa ni Mabingwa wa Kombe la Shirikisho kwa mara ya tano ambapo wamechukua mwaka 1984, 1995, 2000, 2017 na 2020.