Rais Yoweri Kaguta Museveni amewaonya wananchi dhidi ya kuwasikiliza wanasiasa wanaopinga serikali inayotawala ya National Resistance Movement (NRM), akisisitiza jukumu lao katika kudumisha amani ya Uganda.
Akihutubia mbele ya viongozi wa muundo wa mashinani wa NRM kutoka Kanda Ndogo ya Lango katika Chuo cha Lango leo Jumapili, Desemba 7, 2025, kinara huyo wa urais wa NRM, ambaye amekuwa mamlakani tangu 1986 alipoingia Ikulu kupitia vita vya msituni, ameangazia umuhimu wa utulivu, akiwahimiza raia kutanguliza maendeleo ya nchi.
Museveni, 81, amesema utawala wake, ukifanya kazi bega kwa bega na vikosi vingine vya usaidizi kama vile wanamgambo wa Amuka, umeweza kuleta amani nchini Uganda, akisema kwamba hayuko katika uongozi kutafuta chochote ila mustakabali wa taifa la Uganda na Afrika.
Matamshi yake yanakuja huku kukiwa na mvutano wa kisiasa unaoendelea nchini Uganda kabla ya Uchaguzi Mkuu January 2026, ambao kampeni zake za urais zilianza kwa amani kabla ya kushuhudia vurugu huku polisi na wanajeshi wakishutumiwa kuwakandamiza wapinzani wa Bw. Museveni akiwemo Robert Chagulanyi, maarufu kama Bobbi Wine.
Akitafuta kuchaguliwa tena katika Uchaguzi Mkuu wa 2026, Museveni amesema kupitia jasho lake na la wapiganaji wengine, hatimaye Mungu ameibariki Uganda kuwa na amani.
Rais Museveni alisema serikali ya NRM imefanya mengi kwa Uganda, akionya kwamba hata Mungu hatafurahishwa na wale ambao hawawezi kuthamini juhudi za NRM.
"Watu wanaocheza karibu wanapaswa kuwa waangalifu sana. Mnamo 1985, tulipofika hapa (Lango), tulikuta watu wakichinjwa na mvulana anayeitwa Ojuku. Alikuwa akiua watu hapa. Mnamo 1986, ilibidi tuondoe kundi hilo la Ojuku, kisha tushughulike na Kony, Lakwena, wezi wa ng'ombe na hatufurahii juhudi hizo” amesisitiza.
