Mwanamume mmoja aliyegonga gari lake kupitia milango ya mbele ya kanisa la Michigan amefyatua risasi kwa bunduki ya kivita na kuua watu wanne na kuwajeruhi wengine wanane kabla ya kuuawa katika majibizano ya risasi na polisi nchini Marekani jana Jumapili Septemba 28.
Polisi wamesema mhalifu huyo, aliyetambuliwa kama Thomas Jacob Sanford, 40, aliyekuwa Mwanamaji wa Marekani kutoka mji wa karibu wa Burton, alichoma moto kwa makusudi Kanisa la Yesu Kristo la Watakatifu wa Siku za Mwisho, ambalo liliteketea kwa moto na moshi mwingi.
Wawili kati ya waliopigwa risasi walikufa huku wengine wanane wakilazwa hospitalini, wakati saa kadhaa baada ya ufyatuaji risasi, polisi wakiripoti kupata angalau miili miwili zaidi kwenye mabaki ya kanisa hilo yaliyoteketea, ambayo yalikuwa bado hayajasafishwa na huenda yalikuwa na waathirika wengine.
"Kuna wengine ambao hawajulikani waliko," Mkuu wa Polisi wa Kitongoji cha Grand Blanc William Renye ameuambia mkutano na waandishi wa habari.
Afisa wa Ofisi ya Marekani inayohusika na Pombe, Tumbaku, Silaha za Moto na Vilipuzi amesema wachunguzi wanaamini kwamba mpiga risasi alitumia kiongeza kasi pengine petroli kuwasha moto huo, na kwamba baadhi ya vilipuzi vilipatikana.
Mamia ya watu walikuwa kanisani wakati Sanford alipoingia ndani ya jengo hilo, maafisa wawili wa polisi walikimbia kwenye eneo la tukio ndani ya sekunde 30 baada ya kupokea simu za dharura kisha kumpiga risasi na kumuua mshukiwa kwenye eneo la kuegesha magari takriban dakika nane baada ya tukio hilo kuanza.
Wapelelezi watapekua nyumba na simu ya mpiga risasi huyo ili kutafuta sababu. Rekodi za kijeshi za Marekani zinaonyesha Sanford alikuwa Mwanamaji wa Marekani kutoka 2004 hadi 2008 na mkongwe wa vita vya Iraq.
Sadfa, mkongwe mwingine wa Wanamaji mwenye umri wa miaka 40 ambaye alihudumu nchini Iraq ni mshukiwa wa shambulio la risasi katika jimbo la North Carolina lililoua watu watatu na kuwajeruhi wengine watano chini ya saa 14 kabla ya tukio la Michigan.
