Uwanja wa ndani wa Taifa utakaotumika kwa kwa miachuano ya Intercity"
Kocha mkuu wa timu ya mpira wa kikapu ya jiji la Dar es Salaam inayojiandaa na michuano ya majiji kwa nchi za Afirika Mashariki na Kati (Intercity) Kablolah Shomari 'KB' amesema kuwa timu yake ipo tayari kwa michuano hiyo ambayo itaanza Mei 6 mwaka huu jijini Dar es Salaam.
Shomari amesema kuwa watu wengi wameshangazwa na utaratibu wake wa kuchagua idadi ileile ya wachezaji inayotakiwa badala ya kuchagua wengi na kuwachuja na kubaki na idadi ya wachezaji wanaotakiwa kwa mujibu wa mashindano husika.
Amesema kuwa hana wasiwasi kutokana na idadi hiyo ya wachezaji kwa kuwa mashindano hayo yanafanyika hapa nyumbani na kama kuna mapungufu ni rahisi kuyarekebisha muda wowote.
Kwa upande mwingine, katika kuelekea mashindano hayo ya majiji kamati ya maandalizi imesema kuwa tayari wameanza maandalizi ya ukarabati wa miundombinu kwa kufanyia ukarabati maeneo mbalimbali ya uwanja wa ndani wa taifa ambao utatumiaka kwa michuano hiyo.
Mjumbe wa kamati ya mashindano hayo Francis Ngomba amesema japo muda uliosalia ni mfupi kabla ya kuanza mashindano hayo Mei 6, kamati yake ina uhakika kila kitu kitakamilika kufikia siku hiyo ya tukio.
